Одбојкарките на ОК Младост УГД ставија крај на импресивната победничка серија на ОК Наковски волеј, откако попладнево во Штип славеа со максимални 3:0 (25:22, 28:26, 25:13) во последниот натпревар од 15. коло во Првата лига – жени.
Струмичанки цели пет месеци, односно 14 кола, беа недопирливи за конкуренцијата во домашниот шампионат. Ниту еден тим не успеа да ја пронајде вистинската „формула“ за нивно запирање – сè до денешниот дуел во Штип. Младост УГД одигра зрело, дисциплинирано и во клучните моменти покажа поголема концентрација, особено во вториот сет кој го доби по драматична завршница со 28:26. Токму тој момент го скрши отпорот на фаворитот, па третиот сет мина во целосна доминација на домаќинките.
Со овој триумф, шампионатот добива дополнителна неизвесност. На три кола до крајот на регуларниот дел од сезоната, борбата за подобра позиција пред плеј-офот станува сè пожестока, а разликите меѓу водечките екипи се намалуваат.
Во друг натпревар од колото, Вардар ЕМ повторно се радуваше во градската пресметка против Фит Фан Волеј, славејќи со убедливи 3:0. По триумфот во осминафиналето од Купот на ОФМ 2026, вардарки уште еднаш ја потврдија доминацијата над ривалот и дополнително го зацврстија своето место во зоната што води во плеј-офот.
Со влегувањето во самата завршница од регуларниот дел, секој освоен бод може да биде пресуден. Следуваат три кола во кои ќе се кројат позициите и ќе се дефинира патот кон титулата, а денешните резултати најавуваат возбудлива завршница во елитното женско одбојкарско првенство.
