На 58-годишна возраст почина македонскиот актер Кирил Поп Христов – Кили, кој остави препознатлива трага во театарот, филмот и телевизијата.
Тој е роден на 30 јули 1967 година во Скопје. Актерството го студирал на Факултетот за драмски уметности при Универзитетот „Св. Кирил и Методиј“ во Скопје, каде што дипломирал во класата на режисерот и професор Љубиша Георгиевски.
Од 1993 до 2014 година беше дел од ансамблот на Македонскиот народен театар. Во текот на кариерата настапи во бројни театарски претстави, меѓу кои „Ослободување на Скопје“, „Ревизор“ и „Народен пратеник“.
Публиката го памети и по неговите улоги во македонските филмови „Тетовирање“, „Бал-кан-кан“ и „Панкот не е мртов“, со кои даде свој придонес во домашната кинематографија.
Во 2014 година се пресели во Еквадор, каде што живееше со семејството, но и понатаму одржуваше врски со колегите и пријателите од македонската културна сцена.
Со неговото заминување, македонската театарска и филмска сцена губи истакнат актер, кој ќе остане запаметен по својот талент и посветеност.
