Системот за видео-контрола на сообраќајот „Безбеден град“ е на чекор до целосна примена и, ако сè оди според планот, ќе почне да функционира од 1 февруари.
Клучниот услов е изгласување на неопходните законски измени во Собранието, без кои камерите нема да можат официјално да изрекуваат санкции.
Она што најмногу ги интересира возачите е дали секое, па и најмало, пречекорување на брзината ќе значи казна. Одговорот е не. Според најавите, системот ќе дозволува одредена толеранција, усогласена со европската пракса. Тоа значи дека казнувањето нема да започнува веднаш при минимално надминување на дозволената брзина, туку ќе се применува праг кој ќе се движи во рамки од три до десет километри на час над ограничувањето.
Позициите на камерите нема да бидат тајна, тие ќе бидат јавно објавени, а сообраќајната сигнализација на тие делници дополнително ќе се уреди и усогласи со постојните проекти. Намерата е возачите навреме да знаат каде се контролира брзината и да ја прилагодат, наместо системот да се користи исклучиво за казнување.
Пробното функционирање во Скопје веќе покажало конкретни резултати. Во здравствените установи е забележан пад на бројот на тешко повредени лица од сообраќајки, како и намалување на вкупниот број пациенти донесени поради несреќи. Ова се смета за показател дека самото присуство на камерите влијае врз поголема дисциплина кај возачите.
