Во последната деценија македонските патишта се преплавени со половни возила – повеќе од 80% од увезените автомобили не се нови. Само оваа година, на еден нов автомобил доаѓаат просечно 3,5 половни, што е показател за долготрајната доминација на старите возила. Според податоците од Царинската управа, од јануари до ноември 2025 година се увезени 53.867 патнички автомобили, од кои 41.842 биле половни, а само 12.025 нови.
Истовремено, бројот на регистрирани возила е дуплиран во последните дванаесет години – од околу 350.000 во 2012 на речиси 700.000 во 2024 година. Просечната старост на автомобилите е скокната на 19,4 години, што значи дека на патиштата се движат сè повеќе стари и веќе изношени возила. Дури 87,9% од сите автомобили се постари од десет години, додека новите, не постари од две години, сочинуваат само 1,8%.
Градот Скопје носи значителен дел од автомобилскиот товар – речиси секое трето возило во земјава е регистрирано токму во главниот град. Од вкупно 699.111 возила, 229.546 се во Скопје, а уделот е уште поголем кај товарните автомобили – над 38%. Патничките возила во Скопје сочинуваат околу 33% од вкупниот број во земјава, додека мотоциклите се речиси 30%.
На македонските патишта доминираат дизел возила – речиси две третини од патничките автомобили користат дизел гориво. Бензинците бележат постојан пад, додека електричните и хибридните возила, иако сè уште мал сегмент, растат со експлозивна брзина: минатата година електричните се зголемиле за 169%, а хибридните за неверојатни 295%. Во 2024 година на улиците имало 1.507 електрични и 5.078 хибридни возила, наспроти само 561 електрично и 1.287 хибридни во 2023.
Стареењето на автомобилската флота е посебно изразено кај патничките автомобили – просечната старост се зголемила за 3,7 години од 2009 до 2024 година. Товарните и влечните возила стареат побавно, а автобусите речиси не се менуваат – просечната старост кај нив е околу 18,8 години.
Овој тренд ја потенцира континуираната зависност од половни возила и недостатокот на свежи нови автомобили на патиштата. Од вкупно над 455.000 возила кои се под Еуро 5 стандардот, многу се старо производство и со повисоки емисии на штетни гасови.
