Тибо Куртоа во последно време нема многу среќа со своето здравје, бидејќи како поинаку би можеле да го наречете фактот дека по неколкуте повреди во текот на неодамна завршената сезона, сега му е дијагностициран сакроилитис.
Медицинскиот персонал на Реал Мадрид се справи со пријавената болка, а резултатот од дијагностиката беше откритие дека тој има болест на зглобовите во крајниот дел од ‘рбетниот столб. Во превод, тој страда од болно воспаление.
И, бидејќи може да предизвика вкочанетост во тој дел од телото, а симптомите може да се прошират по едната или двете нозе, беше одлучено детално да се испита случајот. Следува конечна одлука за понатамошно лекување на малерозниот Белгиец.
Ова доаѓа во незгоден момент пред Светското клупско првенство и, згора на тоа, натпреварите на белгиската репрезентација во квалификациите за Мундијалот 2026. Она што е познато е дека новиот тренер на кралскиот клуб, Шаби Алонсо, има потреба од Куртоа.
На селекторот на „Црвените ѓаволи“, Руди Гарсиа, уште повеќе му треба, со оглед на тоа што трката за Мундијалот за Белгија започнува сега. Белгија е сместена во групата Ј, заедно со селекциите на Македонија, Велс, Лихтенштајн и Казахстан.
В петок Белгијците ќе играат во Скопје против Македонија, а Куртоа нема да биде присутен. На списокот на Гарсиа други голмани се Мац Селс од Нотингем Форест, Сене Ламенс од Антверп и Мартен Вандеворд од Лајпциг, а место Куртоа го додаде и Нордин Јакерс од Клуб Бриж. Но, освен Селс кој има 9 настапи, сите останатите чекаат деби.
Искусниот 33-годишен Куртоа има 103 настапи за Белгија и играше на Мундијалите во 2014, 2018 и 2022, како и на ЕУРО 2016 и 2020, а не беше дел од ЕУРО 2024 поради кавга со тогашниот селектор Доменико Тедеско.
