Со објавувањето на Конкурсот за упис на нови студенти од денес стартува и електронскиот систем преку кој заинтересираните средношколци можат да се пријават за упис на УГД.
Пријавувањето можат да го направат на следниов линк: https://www.ugd.edu.mk/upisi/prv-ciklus-studii/
Според Конкурсот, има преку 2000 слободни места за редовните студенти во државна квота на Универзитетот „Гоце Делчев“ на сите факултети и академии.
„Ги очекуваме младите од државата, но и од регионот. Интересни сме за студенти од целиот регион, особено за втор и за трет циклус студии. Со вмрежувањето во европските алијанси го подигнавме квалитетот на образование во сите аспекти и тоа станува препознато и надвор од државата“, истакна ректорот на УГД, проф. д-р Дејан Мираковски.
Студиските програми се реакредитирани, а дел се и нови студиски програми. Дванаесетте факултети и трите академии имаат 80 активни студиски програми.
Конкурсот за упис може да се најде на следниов линк:
https://www.ugd.edu.mk/wp-content/uploads/2025/07/konkurs-prv-ciklus-studii-1-rok-2025-26.pdf
„Како и минатите години и оваа година имаме ослободување од плаќање партиципација на поголем број студенти. На Факултетот за медицински науки првите 20 студенти ќе бидат ослободени од партиципација, по 10 ослободувања на Факултет за информатика, Земјоделски факултет, Факултет за природни и технички науки, Економски факултет, Правен факултет, Факултет за туризам и бизнис логистика, по пет ќе бидат на Електротехнички факултет, Машински факултет, технолошко-технички факултет, Факултет за образовни науки, Музичка академија. На Ликовна академија и на Филмска академија по двајца најдобро рангирани кандидати ќе бидат ослободени. На крај го оставив Филолошкиот факултет кој има многу поволности за запишување на новите студенти. Студиската програма по македонски јазик ги ослободува од плаќање студентите за сите четири години студирање. Има поволности за германски, турски, италијански и англиски јазик и книжевност. Информациите можат да се видат и во Конкурсот, каде што е наведено во кој град, која студиска програма и во кој обем е ослободена од плаќање партиципација. Да спомнам и дека студентите кои се дел од спортските екипи на УГД се ослободени од плаќање партиципација, со тоа покажуваме дека го поддржуваме и спортот. Дополнителни квоти имаме за ромските студенти кои, исто така, се ослободени од плаќање. Воедно за лица без родители, лица со инвалидност, воени инвалиди и лица раселени во домови за напуштени деца. Сите овие информации ги има и во Конкурсот“, изјави проректорот за настава, проф. д-р Мишко Џидров.
На денешната прес-конференција беше потенцирано дека има интерес и од студенти од други универзитети кои сакаат да се префрлат на Универзитетот во Штип и дека има интерес од студенти од скоро сите држави.
Универзитетот и оваа година нуди активни студиски програми на англиски јазик и тоа на Економски факултет, Правен факултет, Факултет за информатика и Медицински факултет. Акредитирани се на англиски јазик и студиските програми на Музичка академија и на Филмска академија.
