Ајкула долга околу 2,5 метри се појавила во плитките води на плажата Лутра Ореас Еленис, во близина на Коринт, предизвикувајќи вознемиреност меѓу посетителите и жителите на областа.
Според грчките медиуми, морското животно било забележано на многу мала оддалеченост од брегот, во Коринтскиот Залив. Сведоци го снимиле моментот со мобилни телефони, а снимката брзо се проширила во локалните медиуми.
Иако глетката предизвикала паника и голем интерес на плажата, грчките медиуми наведуваат дека вакви појави не се целосно невообичаени во грчките мориња. Морски експерти претходно посочувале дека во Грција има повеќе видови ајкули, но најчесто станува збор за видови што избегнуваат контакт со луѓе и се движат по риби или храна во крајбрежните зони.
Во последните недели во Грција биле пријавени уште неколку слични појави на ајкули во близина на брегот, меѓу кои и случај во областа Виотија. Засега нема информации за повредени лица или интервенција поради инцидентот.
