Експертите истакнуваат дека белата боја на чоколадото не значи дека му е истечен рокот или дека е опасно за јадење, туку дека дошло до природна промена во неговиот состав.
Ако некогаш сте го отвориле вашето омилено чоколадо и сте забележале дека површината станала белузлава, веројатно сте помислиле дека е расипано.
Постојат две причини зошто чоколадото станува бело: шеќерно цветање и масно цветање.
Шеќерно цветање
Шеќерното цветање се јавува кога чоколадото се чува на места со голема влажност. Влажниот воздух го топи шеќерот на површината, кој потоа кристализира кога чоколадото се суши. Резултатот е тенок, груб, бел слој.
Масно цветање
Масно цветање се јавува кога чоколадото е изложено на температурни промени, на пример, ако прво било во фрижидер, а потоа на топло место. Потоа какао путерот се крева на површината и формира белузлав, мазен слој.
Иако таквото чоколадо повеќе нема тој совршено мазен изглед и може да има малку погруба текстура, не е расипано ниту штетно за јадење. Вкусот може малку да се измени, но чоколадото е сè уште безбедно за консумирање.
За да го одржите вашето чоколадо во најдобра состојба, чувајте го на суво, темно место, на температура помеѓу 15 и 18 степени, подалеку од извори на топлина и влага.
