На одиграниот дуел помеѓу екипите на Брегалница и Шкендија од Арачиново, вчера во Штип актерите ги поделија бодовите. Мечот заврши 1:1, а изобилуваше со многу прекини, тензии и протестирања. Шкендија со голот на Шаркоски поведе со 0:1, а резултатот го изедначи Костадин Капсаров од пенал во 68.минута. Тоа беше и конечниот епилог на натпреварот. Со овој бод, Брегалница го задржа првото место на табелата, сега заедно со ФК Скопје имаат по 65 бодови, но штипските сини имаат подобар меѓусебен скор.
За да го задржат првото место, потребни се 2 победи во последните 2 кола во кои штипјани гостуваат во Кочани кај Осогово и во последното коло ја пречекуваат веќе отпишаната прилепска Победа. Впрочем, последното коло во Штип треба да биде и своевидна промоција на Брегалница во прва лига.
