Раководството на УЕФА направи огромни промени во системот на натпреварување во Лигата на Шампионите за оваа натпреварувачка сезона, а Александар Чеферин и неговите најблиски соработници планираат уште неколку измени што би стартувале веќе од сезоната 2025/26.
Германскиот весник „Билд“ повикувајќи се на извори блиски до европската куќа на фудбалот најавува дека се планираат три нови промени во ЛШ, од кои најголемата ќе биде укинување на продолженијата од два пати по 15 минути во нокаут фазата.
„Првата промена се однесува на пенал-рулет веднаш по 90-те минути, наместо да се играат продолженија. Со тоа, би се намалил притисокот врз фудбалерите, кои се жалат на премореност, а завршницата би кулминирала со возбудлива пенал-серија“, пишува Билд.
Втората промена според германскиот весник се однесува на тимовите кои се во Топ 8 и имаат директен пласман во осминафиналето. Тие потоа согласно пласманот ќе имаат предност да го играат реваншот на домашен терен во однос на послабо рангираниот тим од себе. Ова сезонава беше случај само во осминафиналето, но не и во четвртфиналето, па така Борусија Дортмунд беше домаќин на реваншот со Барселона, а Реал вториот меч го играше во Мадрид со Арсенал, иако „милионерите“ и „кралевите“ имаа послаб ефект во групната фаза од противниците. УЕФА ја призна грешка уште пред неколку седмици и речиси сигурно оваа промена ќе биде реализирана за сезоната 2025/26.
„Екипи од иста земја ќе може да се среќаваат едни против други од четвртфиналето. Според актуелното правило ривали од иста држава можеа да играат веднаш по групната фаза, но бројките покажаа дека дуелите Брест – ПСЖ, Баерн – Баер, па дури и Реал Мадрид – Атлетико Мадрид, не импресионирале со гледаност. Поради ова, УЕФА планира да се врати на старото правило, клубови од иста земја да може да се сретнат најрано во четвртфиналето од Лигата на Шампионите. Тоа е третата промена што се планира“, најавува „Билд“.
