На денешен ден, 2 јули, пред точно 61 година, фудбалската експедиција на Брегалница Штип доживеа една од најголемите трагедии во својата историја – настан кој засекогаш ќе остане врежан во сеќавањата на штипската и македонската спортска јавност.
Во 1964 година, Брегалница беше во налет – тимот од Штип сонуваше за историски пласман во тогашната Втора југословенска лига, и по победата од 1:0 во првиот квалификациски натпревар против Титоград (денешна Подгорица), надежта беше голема. Стрелец на победничкиот гол во Штип беше Иштван Гордош.
Но, патот кон реваншот во Црна Гора, наместо славен, се претвори во трагедија.
На 2 јули, автобусот на ПИМ „Македонка“ кој ја превезуваше фудбалската експедиција на Брегалница, пропадна во бездна, по силен тресок што го прекина веселото расположение меѓу играчите. Многу фудбалери беа тешко повредени, а еден од нив, Никола Караколев, подоцна им подлегна на повредите. Оваа несреќа претставува најтажниот момент во историјата на клубот.
Без оглед на трагедијата, Брегалница го одигра и реваншот – загуби минимално со 1:0, но исходот беше во втор план.
Денес, 2 јули, ја одбележуваме оваа црна годишнина со голема почит кон играчите, стручниот штаб и сите членови на Брегалница кои беа дел од таа кобна експедиција. Особена почит за Никола Караколев, кој го загуби животот.
