Претходно измиените, спакувани салати за многумина се прв избор кога сакаат брз и „здрав“ оброк без многу подготовка. Но, експертите за безбедност на храна предупредуваат дека таа практичност може да има своја цена.
Професорот по исхрана од Универзитетот Нортистерн и автор на книга за безбедност на храна, Дарин Детвајлер, истакнува дека токму ваквите производи се меѓу поризичните во продавниците. Иако потрошувачите очекуваат безбедност, реалноста, вели тој, е поинаква: „Спакуваните салати остануваат едни од поризичните производи поради можноста за контаминација низ целиот синџир на снабдување.“ Во минатото, додава, токму ваквите производи биле поврзани со бројни епидемии на труење со храна, кои во потешки случаи завршувале со хоспитализации, па дури и со смртни исходи.
Бактерии на листестиот зеленчук
Проблемот не е изолиран случај. Листестиот зеленчук е поврзан со милиони заболувања секоја година, а бактерии како ешерихија коли, салмонела и листерија можат да стигнат до листовите во различни фази од производството, од одгледување до пакување.
Контаминацијата често започнува уште на нивите. Загадена вода за наводнување, близина на сточарски фарми или контакт со почва и животни го зголемуваат ризикот. Како што објаснуваат експертите, бактериите можат да се пренесат и за време на бербата, преку опрема или човечки контакт.
Дополнителен проблем настанува при преработката. За разлика од цела главица салата, спакуваните мешавини често доаѓаат од повеќе фарми и се обработуваат заедно. „Еден контаминиран лист може да влијае на илјадници пакувања“, предупредува Детвајлер.
Големите садови за миење и обработка, иако ефикасни за индустријата, можат да послужат како идеално место за ширење на бактерии.
Дополнително миење не е решение
Ниту ладењето не е целосно решение. Иако го забавува растот на микроорганизмите, не ги уништува. Ако дојде до прекин во ладниот синџир за време на транспорт или складирање, бактериите можат дополнително да се размножат.
Многумина ќе помислат дека решението е едноставно – дополнително да ја измијат салатата дома. Но, експертите велат дека тоа не се препорачува. Со миењето најчесто не се отстрануваат бактериите, а постои и ризик од дополнителна контаминација од мијалникот, приборот или рацете. Како што истакнуваат, одредени патогени можат цврсто да се врзат за површината на листовите и не можат да се измијат со вода.
За оние кои сепак избираат спакувани салати, советот е претпазливост. Важно е да се провери рокот на траење и евентуалните повлекувања на производи, да се избегнуваат пакувања што изгледаат влажно или лигаво и да се обезбеди салатата постојано да остане разладена, од продавница до фрижидер.
Сепак, побезбедна алтернатива и понатаму е класичната – цела главица салата или свеж спанаќ. Ваквите намирници имаат помала површина изложена на обработка и потенцијална контаминација, а дома можат темелно да се измијат пред консумирање.
Заклучок е дека иако нудат практичност, спакуваните салати не се без ризик. Малку повеќе време во подготовката може да значи и поголема безбедност на трпезата, пишува Нет.хр.
