11.6 C
Shtip
spot_img

Доц. д-р. Мирела Василева: „Сончевите зраци не лечат – тие маскираат, па оштетуваат“

Со доаѓањето на летото, кожата станува прва на линија на удар – од сончеви зраци, високи температури, потење до инфекции. Доц. д-р. Мирела Василева, раководител на Одделот по дерматовенерологија при Клиничката болница во Штип, предупредува на бројни дерматолошки предизвици кои не смееме да ги игнорираме.

Летото не е само сезона на море, туку и на изгореници

Најчестите дерматолошки состојби со кои пациентите се соочуваат во летниот период се „изгореници од сонце, топлотен осип, инфекции, убоди од инсекти и влошување или појава на нови акни“. Како што објаснува д-р Василева, овие појави се резултат на „растот на температурите, директната изложеност на УВ зраци, потењето и задржувањето на пот во порите“.

Дополнително, некои хронични состојби забележуваат влошување токму во летните месеци:
„Дерматолошки состојби во кои забележуваме егзацербација овој период се атопискиот дерматит, розацеа, варикозни вени, дискоиден лупус еритематодес…“

Сонцето како волк во овча кожа

Иако понекогаш УВ-зраците може да имаат краткотраен корисен ефект кај состојби како псоријаза или акни, д-р Василева вели: „Сонцето не лечи – тоа маскира, а потоа оштетува.“

Таа предупредува дека „УВ зраците во поголем процент негативно влијаат на кожата со тоа што предизвикуваат оштетување на ДНК на клетките“, што води до предвремено стареење, хиперпигментации и зголемен ризик од карцином. Првите знаци на оштетување се црвенило, лупење, појава на пигментни флеки и сушење на кожата. Хроничната изложеност води до фото-стареење: „рана појава на брчки, губење еластичност, рапава текстура, хиперпигментации и, на крајот, преканцерози и карцином.“

Заштитата од сонце не е избор, туку обврска

Клучниот совет од докторката е јасен и гласен:
„Ако треба да издвојам една единствена, но суштинска препорака за заштита на кожата во летниот период, таа би била да доследно, правилно и редовно се употребува широкоспектарен фотозаштитен препарат со минимум СПФ 30.“ Таа потенцира дека фотозаштитата мора да биде „индивидуализирана според фототипот, активностите и специфичните кожни состојби“. Дополнително објаснува дека СПФ 25 блокира околу 95% од УВБ зраците, додека СПФ 50 блокира околу 97%, а РА+++ значи висока заштита од УВА зраците. „Фотозаштитата не е само козметички совет, таа е медицинска потреба, основа на секој превентивен и терапевтски дерматолошки протокол.“

Море или базен?

Солената вода, според д-р Василева, може да има благ антисептичен ефект и да помогне кај акни, псоријаза и некои рани, но: „Може да ја влоши состојбата кај сува и атопична кожа која дополнително ќе ја иритира.“

Хлорот, пак, е целосно непожелен: „Хлорот од базени е многу силен иританс особено за чувствителна кожа и нема никаков позитивен ефект за неа.“

Исхрана: Сојузник или невидлив непријател?

Исхраната игра клучна улога во дерматологијата.
„Акните се поврзани со висок гликемиски индекс. Себореичниот дерматит се влошува со алкохол, масти и шеќери. Розацеата реагира на зачинета храна и алкохол.“
Од друга страна, антиоксиданси, омега-3 масни киселини и доволен внес на вода можат да го намалат воспалението и да ја подобрат состојбата на кожата.

„Кожата ни е една за цел живот и оштетувањата од детството ги носиме до старост. НЕ ЕКСПЕРИМЕНТИРАЈТЕ!“, потенцира Василева. 

Автор на текстот: Даница Среткоска

━ повеќе содржини

EMIGRANTI на штипјанецот Влатко Јакимов во нов сингл!

Хип-Хоп групацијата во Лондон, предводена од штипскиот музички артист Влатко Јакимов вчера го објави својот нов сингл "Татко и син" во кој Влатко настапува...

ГКК Штип се засили со бек од Соединетите Американски Држави

Новиот член на најдобрата македонска кошаркарска конкуренција ГКК Штип ги засили своите редови со бек од Соединетите Американски Држави. Се работи за 24-годишниот Лангстон Лав...

Штипјанката Ива Колева со историски деби настап во сениорската репрезентација

Историски момент за штипската кошарка! Седумнаесетгодишната Ива Колева стана првата штипјанка која добила повик во сениорската женска кошаркарска репрезентација на Македонија, испишувајќи нова страница...

Професорката на УГД Јаневиќ-Ивановска одликувана со орден во Франција

Професорката Емилија Јаневиќ-Ивановска, која предава на студиската програма по фармација на Универзитетот „Гоце Делчев“ во Штип, доби значајно француско признание за својата академска и...

Вечерва: Традиционална ноќна трка по повод Денот на ослободувањето на Штип

Штип вечерва повторно ќе биде во знакот на спортот, традицијата и одбележувањето на еден од најзначајните датуми во историјата на градот. По повод 8...
spot_img