Во работилницата на СОУ „Димитар Мирасчиев“ во Штип, денес започнаа активностите од проектот „Со рачни вештини до сопствен бизнис“, организиран од Добредојде Македонија, со поддршка на Амбасадата на Словенија.
Проектот има за цел да ги поттикне младите и жените да развијат претприемачки дух преку стекнување и усовршување на занаетчиски вештини. Денешната работилница се фокусираше на креативна пренамена на милјеа, односно традиционални везени ткаенини, кои добија современ израз благодарение на менторството на реномираната модна дизајнерка Ирина Тошева.
Тошева ги водеше учесниците низ процесот на реинтерпретација на стари текстили, со што им покажа како културното наследство може да биде инспирација за модерен и одржлив дизајн. Работилницата беше исполнета со ентузијазам, идеи и практична работа, а создадените парчиња ќе бидат дел од мини-изложба на крајот од проектот.
Настанот претставува само прв чекор од низата активности што ќе се реализираат во рамки на проектот, кој ќе опфати и обуки за бизнис-планирање и маркетинг, насочени кон охрабрување на учесниците да започнат сопствен занаетчиски или дизајнерски бизнис.
