Институтот за јавно здравје (ИЈЗ) апелира граѓаните да ги почитуваат препораките за заштита од високите температури, бидејќи, според најавите, топлотниот бран ќе трае најмалку до 7 август.
Од ИЈЗ предупредуваат дека најголем ризик од изложеност на топлина има во периодот од 11 до 17 часот, кога се препорачува да се избегнува престој на директно сонце и физичка активност на отворено.
Институтот посочува дека високите температури можат да предизвикаат слабост, вртоглавица, гадење, прекумерно потење, грчеви и сува уста, а во потешки случаи може да дојде до престанок на потење, конфузија, забрзана работа на срцето, отежнато дишење, губење на свеста и животозагрозувачка состојба.
Најризични категории се лицата постари од 60 години, децата, бремените жени, лицата со хронични заболувања, работниците кои работат на отворено и социјално ранливите категории.
ИЈЗ препорачува носење лесна и светла облека, капа и очила за сонце, престој во климатизирани простории, редовно внесување вода и лесна храна, како и избегнување алкохол, кофеин и многу ладни пијалаци. Домовите треба да се проветруваат во вечерните часови, а преку ден да се држат затворени прозорците и ролетните.
Институтот потсетува и дека никогаш не треба да се оставаат луѓе или деца во затворено паркирано возило, бидејќи температурата во него за кратко време може опасно да се зголеми.
Доколку некое лице почувствува силна слабост, вртоглавица, интензивна жед или главоболка, треба веднаш да се премести на поладно место, да внесе течности и да ја измери телесната температура. Ако лицето има топла и сува кожа, грчеви или е во бессознание, потребно е веднаш да се повика Итната медицинска помош на 194 или 112, а до пристигнувањето на екипата да се започне со разладување на телото и лицето да се постави во соодветна положба.
Од ИЈЗ апелираат граѓаните внимателно да ги следат препораките и при појава на невообичаени симптоми веднаш да се консултираат со својот матичен лекар.
