Цените на нафтата нагло паднаа синоќа откако американскиот претседател Доналд Трамп навести дека конфликтот со Иран би можел да се приближува кон крај. По интервјуто за Си-Би-Ес њуз, во кое Трамп изјави: „Мислам дека војната речиси се приближува кон крај“, цената на суровата нафта Брент падна на 90 долари за барел, што е за 30 долари помалку во споредба со претходната ноќ.
Тој исто така изјави дека Иран „нема морнарица, нема комуникации“, како и дека „нема ни воздухопловство“, истакнувајќи дека Соединетите Американски Држави се далеку пред првичната проценка според која војувањето требало да трае од четири до пет недели. Трамп додаде и дека се разгледува можноста САД да преземат контрола врз Oрмутскиот Теснец, клучен за глобалното снабдување со нафта и гас, кој во голема мера го блокира Иран.
Подоцна во понеделникот, на својата платформа Трут соушал, Трамп напиша дека Соединетите Американски Држави, доколку Иран преземе чекори со кои ќе го запре протокот на нафта низ Oрмутскиот Теснец, ќе „удрат дваесет пати посилно отколку досега“.
Стравот од нарушување на снабдувањето во понеделникот наутро ја подигна цената на суровата нафта Брент над 120 долари за барел, што е највисоко ниво од 2022 година. Сепак, сегашната цена и натаму е повисока од онаа пред почетокот на конфликтот, кога Брент се тргуваше по околу 70 долари за барел. објави Скопје1.мк
