Септември утре ќе започне како продолжение на август, со сончево и многу топло време и температури кои во најтоплите делови од Македонија ќе достигнат 36-37 степени. За Скопскиот регион е активно и жолто предупредување за високи температури, а најжешко ќе биде во Повардарието и југоистокот.
Утрешниот ден треба да биде последен од најизразениот бран на жештина. Тоа сепак не значи нагло заладување од среда. Во делови од земјата и на 2 септември температурите ќе останат околу 34-36 степени, но ќе се зголемува можноста за локална нестабилност. Поосетливо освежување се очекува кон четврток, особено во западните и северните делови.
Актуелните модели за Скопје даваат максимум околу 36 степени, за Кавадарци околу 36, Штип 35, Гевгелија до 35-37 и Струмица до околу 36 степени. Во западните повисоки подрачја ќе биде нешто посвежо, со околу 30 степени во Гостивар и Ресен.
Во Охридско, Битолско и делови од западна Македонија во попладневните часови постои можност за локален краткотраен дожд или грмежи, но во најголем дел од земјата денот ќе помине со многу сонце.
Во Скопје максималната температура ќе достигне околу 36 степени, со претежно сончево време. Од среда температурата постепено ќе се намалува, на околу 35 степени, во четврток на 33, а во петок околу 32 степени.
