Кошаркарската Куќа на славните на Нејсмит ја објави класата за 2026 година, во која се вклучени девет члена, кои ќе бидат поздравени за време на свеченостите во август, пишува НБА-лигата.
Објавата се одржа во Индијанаполис, градот домаќин на машкиот фајналфор-турнир на НЦАА-натпреварувањето за годинава.
Така, во Куќата на славните ќе бидат примени Џои Крофорд (судија), Марк Фју (тренер), Док Риверс (тренер), Амаре Стадемаер (кошаркар), женската репрезентација на САД од 1996 година, Елена Деле Дон (кошаркарка), Шамик Холдскло (кошаркарка), Кандис Паркер (кошаркарка) и Мајк Д’Антони (тренер).
– Куќата на славните на Нејсмит е горда што ја пречекува класата за 2026 година, група што го одразува најдоброто што го нуди овој спорт.
Од судија што ги постави стандардите во текот на четири децении, преку тренери што изградија династии на секое ниво и играчи што ги редефинираа своите позиции, до визионер што го промени начинот на кој се игра играта и женска класа предводена од национален тим што помогна во лансирањето на цела лига, заедно со три од најостварените играчи што женската игра некогаш ги видела, чест ни е да ги пречекаме во Спрингфилд – рече Џон Л. Долева, претседател и извршен директор на кошаркарската Куќа на славните на Нејсмит, пренесе НБА.
