Првите СМС пораки од системот „Безбеден град“ пристигнуваат кај возачите -стартуваше пред најавениот термин
Иако МВР најави старт за 1 декември, дел од возачите уште на 30 ноември ги добија првите СМС-пораки за регистрирани прекршоци. Известувањата пристигнувале од испраќачот МВР–СЦ и содржеле регистарска табличка и линк до записникот со деталите за прекршокот, вклучително и технички податоци од камерите „Tattile“.
Граѓаните изјавиле дека системот очигледно бил активиран ден порано од планираното. Според најавите, периодот до Нова година требало да биде тест-фаза со предупредувања, но пораките покажале дека камерите веќе целосно функционирале и евидентирале прекршоци.
Најавено беше дека од 1 јануари системот ќе премине во целосна примена и секој прекршок ќе биде казнуван без толеранција, а сопствениците ќе добиваат записник и налог за плаќање. Камерите веќе беа поставени на клучни раскрсници во Скопје и на автопатите по коридорите 8 и 10, со цел намалување на брзото возење, минувањето на црвено и неправилното паркирање.
Според денешните реакции, технологијата тивко го започна процесот – камерите снимале, системот регистрирал, а возачите ги добиваа првите пораки уште пред „официјалниот“ датум – Објави Скопје 1.
