Според официјалниот веб-сајт на Меѓународната математичка олимпијада, штипјанецот Дамјан има освоено три сребрени и два златни медали изминатите шест години. Последно нашиот математичар издоминира на Балканската математичка олимпијада каде што освои злато.
Во Македонија се кријат многу генијалци, а еден од нив е и штипјанецот Дамјан Давков кој „растури“ на низа натпревари по математика, односно математички олимпијади.
Дамјан, кој учи во Математичко-информатичката гимназија во Скопје имаше чест да се натпреварува на првата Европска математичка олимпијада која се одржа во Латвија.
Овде Дамјан освои злато, додека второто место му припадна на уште еден ученик од Математичко-информатичка гимназија – Ивано Божиновски:
„Дамјан Давков и Ивано Божиновски на врвот во Европа. Горди сме на нашите ученици кои го развеаја македонското знаме во Литванија со еден златен и еден сребрен медал“, стои во Фејсбук објава на училиштето.”
Во меѓувреме Дамјан се натпреваруваше и на Македонската олимпијада по информатика каде што се закити со злато.
Како што споделија од гимназијата во којашто учи Дамјан, олимпијадата се одржа на 16 и 17 април.
Последниот голем успех на Дамјан е на Балканската математичка олимпијада во Солун каде што освои злато.
На истиот натпревар учествуваше и Ивано Божиновски кој овој пат си замина дома со бронза.
„Уште големи успеси за нашите незапирливи математичари. На Балканската математичка олимпијада во Солун Дамјан Давков освои злато, а ученикот Ивано Божиновски освои бронза.
Нема поголем успех за училиште од успехот на неговите ученици“, пишува на Фејсбук објава на гимназијата.
На Балканската математичка олимпијада учествуваа 148 натпреварувачи од 25 држави.
Во јули годинава ќе се одржи и Меѓународната математичка олимпијада, на која Дамјан Давков веќе има учествувано, и тоа шестпати.
Според податоците на официјалниот веб-сајт на Олимпијадата, тој има освено 2 златни и 3 сребрени медали, како и едно почесно признание.
Според агрегаторот на резултати moreresults.org, каде се собираат резултатите од неколку математички натпревари, Дамјан е меѓу најдобрите според освоените медали.
Иако е важно да се напомни дека веб-сајтот е агрегатор и можно е некои натпревари и учесници да се изоставени, според податоците што се достапни сега, од 17 учества, Дамјан има освоено дури седум златни медали, шест сребрени, една бронза, како и три почесни признанија.
Дури и да не е на врвот, успехот на Дамјан е во најмала рака импресивен и тој е доказ дека и во Македонија навистина се кријат вистински генијалци.
