Штипјанката Марија Патриклиска меѓу 30 најуспешните жени менаџери во државата
Агенцијата Марили по 30-ти пат ќе ги додели признанијата на најуспешните жени менаџери од земјава, на свечена манифестација што ќе се одржи во Скопје.
Јубилејното издание на „Избор на најуспешни жени менаџери 2026“ ќе обедини бизнис-лидерки од различни сектори, кои со својата работа оставиле значаен белег во македонската економија.
Годинава ќе бидат наградени 30 менаџерки, избрани врз основа на строги критериуми, меѓу кои најмалку десетгодишно успешно управување во приватниот сектор, континуирани деловни резултати и препораки од деловни партнери.
Наградата што ќе ја добијат лауреатките е статуетката „Жена водилка“, авторско дело на штипјанецот Никола Смилков.
Меѓу годинашните лауреатки се менаџерки од финансискиот сектор, здравството, индустријата, услугите и претприемништвото, што ја потврдува разновидноста и силата на женското лидерство во земјава.
Во објавената листа на најуспешни жени менаџерки се и м-р Марија Патриклиска, менаџер во одделот за човечки ресурси, ЕАМ ДОО, Штип, м-р Ѓулај Салиевска-Гештаковска, управителка и генерална менаџерка на „Кондево МК ДООЕЛ“ Штип, м-р Татјана Стерјева, спец. фармацевт, сопственичка и генерална менаџерка, „Еурофарм“ , Битола и други.
