Штипјанката Ива Цацкова (20) зачекорила во професијата модел на 13-годишна возраст со идеја да го изрази својот креативен дух и да се предизвика себеси во оваа динамична и интересна професија.
– Моделството ми овозможува да изразам различни аспекти на мојата личност преку фотографиите и да работам со луѓе од различни култури и професии. А најважно од сѐ е тоа што мојата најголема желба е да патувам – ни вели Ива на почетокот на разговорот.
Денес таа студира архитектура на внатрешен дизајн, вљубеник е во уметноста и креативното изразување. Објаснува дека токму оваа страст ја поттикнала да се посвети на моделството на кое гледа како на уште една форма на уметност.
– Мојата кариера ја започнав преку матичната агенција „Моделс ин“, каде ја добив можноста да се развивам и да работам како интернационален модел, на интересни проекти, со кои продолжувам да го надградувам моето искуство во оваа професија – вели Ива.
За еден од своите најголеми успеси го смета ангажманот во Турција, каде што имала прилика да учествува во голем број престижни проекти.
– Еден од најзабележителните моменти беше кога снимив кампања за „Хуавеј“, што беше навистина голема чест и признание за мојата работа како модел – ни раскажува.
Младата убавица смета дека е можно да се живее од моделски ангажмани и во Македонија.
– Но, потребно е многу посветеност, упорност и работа. Пазарот можеби не е толку голем како во некои други земји, но со правилно планирање и професионализам, моделството може да биде одржлива професија – ни објаснува и додава дека професионализмот во оваа фела е клучен.
„Важно е да си посветен, да ги почитуваш роковите и да имаш сериозен пристап кон секоја задача. Соработката со професионални тимови е важна за да се постигнат високи и квалитетни резултати и да се гради добра репутација“.
Себеси се гледаа како успешен модел со меѓународна кариера, со многу повеќе реализирани проекти на глобално ниво.
– Плановите ми вклучуваат проширување на мојата кариера во други модни центри, како Париз или Милано, и соработка со познати модни брендови – додава Ива.
А кога не е пред објективите, таа е опуштена, љубопитна и спонтана личност. Така се опишува себеси. Вели дека најмногу од сè сака да патува, да запознава нови култури и да ужива во секој момент од животот.
На прашањето дали верува во љубов и што е потребно да поседува еден маж за да ја освои, убавицата ни одговара:
„Да, верувам во љубов. За да ме освои некој маж, најважно е да биде искрен и со силен карактер. Ценам кога некој е амбициозен и посветен на своите цели, исто како што јас сум посветена на моите“.
