Студен бран со засилен северен ветер ќе донесе промена на временските услови во текот на денешниот ден. Врнежите кои претежно ќе бидат од дожд постепено ќе преминуваат во снег, најнапред на повисоките, а локално и на некои пониски подрачја. Во планинските предели од западниот дел на земјата се очекува создавање нова снежна покривка, додека послаб снежен слој е можен и во дел од котлините. Утринските температури ќе се движат од -2 до 5 степени, а дневните ќе бидат меѓу 0 и 10 степени.
Во главниот град ќе преовладува променливо облачно време, со повремени врнежи од дожд, поизразени во вечерните часови и во текот на ноќта. Ќе дува умерен ветер од север, а температурите ќе се движат од минимални 1 до максимални околу 5 степени.
Во наредниот период, поради изразено циклонско влијание, времето ќе остане нестабилно со чести повремени врнежи. На пониските места тие ќе бидат од дожд, додека на планините ќе продолжи снегот. Во петок се очекува краткотрајно подобрување и смирување на времето, но за време на викендот, особено во сабота, повторно се најавуваат локални врнежи од дожд и снег, кои на одредени места може да бидат и поинтензивни. Температурите ќе продолжат со постепено намалување.
