„Си-ен-ен травел“ објави сторија за природните убавини на Македонија, мапирајќи ја нашата земја како туристичка дестинација што вреди да се посети. Во продолжение прочитајте на каков начин се опишани најубавите места во земјата.
„Опкружена со гребени и врвови кои нудат пејзажи што го опфаќаат целиот спектар од четирите годишни времиња – од зелени падини до снежни карпи – Македонија нуди шанса за избирање на патот по кој поретко се оди како дестинација во Јужна Европа.
Порано позната како Македонија по прогласувањето на независноста од Југославија во 1991 година, Северна Македонија е недоволно истражен дел од Балканот чија слоевита историја, од византиската и османлиската до југословенската ера, се комбинира со нејзините сеприсутни планини за да создаде збир на регионални култури со цврста посветеност на традицијата и топло, срдечно гостопримство.
Сместена северно од Грција, оваа нација без излез на море е една од најпланинските земји во светот, а драматичниот терен е централен за нејзиниот идентитет.
– Кога влегувам во мојот автомобил, во кој било правец и да сакам да возам, имам планина пред мене и планина зад мене. Мислам дека ова е најдобриот начин да ја опишам мојата земја – вели Фросина Пандурска-Драмиќанин, која живее во главниот град на земјата, Скопје, и работи на рурален развој и зајакнување на заедницата.
Земјата со 2 милиона жители сè уште не ги доживеала толпите туристи што го задушуваат поголемиот дел од Јужна Европа секое лето. Оние што се вклучени во туристичката индустрија се претпазливи во привлекувањето таков вид туризам бидејќи би можел негативно да влијае врз квалитетот на животот на жителите. Но, тие знаат дека земјата има многу што да понуди и дека туристичкиот сектор сè уште има простор за раст.
Манастири, езера и планинарење
Голем дел од она што може да се види во земјата лежи покрај малите, кривулести патишта што се протегаат низ селските предели. Овие патеки се исполнети со беспрекорно сочувани византиски манастири, некои стари повеќе од 1.000 години, исполнети со украсни дрвени изработки, позлатени лустери и антички фрески. Меѓу најпознатите е Бигорскиот манастир. Националниот парк Маврово, пак, може да ви понуди октомвриско возење кое со своите бои може да ја „засрами“ секоја разгледница од Нова Англија.
Свети Наум, кој стои на работ на Охридското Езеро од 905 година, е уште еден добро познат манастир. Охридското Езеро е бисер на земјата. Како дел од светското наследство на УНЕСКО, опкружено е со планини, а областа на Охридското Езеро привлекува посетители од целиот Балкан секое лето. Некои доаѓаат за екотуризам. Езерото се гордее со околу 1.200 вида растенија и животни. Други доаѓаат за потрадиционално туристичко искуство: купување бисери по чаршијата во историскиот град Охрид, или пиење коктели во баровите сместени покрај брегот. Друг прекрасен национален парк, Галичица, го прегрнува источниот брег со спектакуларното Преспанско Езеро.
На северозападната граница на земјата со Косово, желните планинари можат да најдат изобилство предизвикувачки патеки. Некои селани во планините сè уште практикуваат древна практика на овчарств,о позната како преселба на овци, водејќи ги своите овци до селата во зима и нагоре кон планинските врвови во лето.
Природна убавина и зачувани културни традиции
Истите планини кои се темел на природната убавина на земјата, исто така, служеле како физички бариери кои формираат различни културни региони, со што се негуваат и одржуваат традиции кои исчезнале на друго место.
Што се однесува до храната, ајварот, намаз од црвена пиперка што го има низ целиот Балкан, се третира со посебна почит овде, при што семејствата се мачат од самрак до зори во дворовите, во есенските месеци, за да наполнат доволно тегли со ајвар за цела година. Ракијата, висококвалитетен балкански пијалак што Македонците обично го прават од грозје, се служи заедно со обилни порции салати, печено месо и свеж леб печен во рерна.
Климата ѝ дава можност на Македонија да биде една од најголемите вински земји во регионот, со посебна концентрација во регионот Тиквеш. Други работи што патниците треба да ги бараат се бурек, најчесто послужен за појадок, и ќебапи. Други локални деликатеси се пастрмалија од свинско месо и чорби.
Скопје
Речиси срамнето со земја во земјотресот во 1963 година, Скопје беше дел од масивен меѓународен напор за обнова. Во Старата чаршија на градот може да се најде сè, од свежи производи до барови и антиквитети. Масите во кафеаните во чаршијата и пошироко се преполни од рано наутро до доцна во ноќта.
Градот е богат со културни настани, вклучувајќи филмски и музички фестивали. Голем дел од ова е остаток од југословенските денови на земјата, кога владата силно ги субвенционирала културните центри и уметничките програми.
