Поранешната Мис на Бугарија, Ивајла Бакалова, ја коментираше скандалозната сцена од концертот на Цеца Ражнатовиќ во Велес, каде што српската пејачка се појави завиткана во бугарското знаме. Според неа, Цеца сосема свесно го направила тоа.
Во гостување во утринската емисија „Претпладне“ на Бугарската телевизија (БТВ), Бакалова откри дека лично ја познава Цеца и дека во минатото соработувале.
„Јас сум личноста што го организира нејзиниот концерт на стадионот „Васил Левски“ во 2007 година. Таа беше тука пет дена со своите деца – ја познавам лично и е прекрасна личност“, изјави Бакалова.
Сепак, таа ја доведе во прашање искреноста на Цеца во врска со неодамнешниот инцидент:
„Нема шанси Цеца да не знаела дека го држи бугарското знаме! Таа совршено добро знае колку е деликатна темата за односите меѓу Бугарија и Македонија. Според мене, ова беше изнуден ПР-потег. Таа постојано се обидува да биде во центарот на вниманието и да направи реклама зад своето име“, изјави поранешната Мис. Бакалова додаде дека на концертот имало и бројни Бугари, што само го засилило интересот и тензијата околу моментот кој ги разбесни македонските фанови.
„Музиката треба да обединува, а не да разделува. Живееме во 21. век – не е вообичаено ваквите спорови да дојдат до ова. Луѓето треба да ја почитуваат историјата и да престанат со омраза“, заврши Бакалова.
