Изминатиот викенд, особено вчера, во Штип буквално се тресеше и одекнуваа експлозии, што понекогаш наликуваа на грмење, но често, како што сведочеа штипјани во становите на повисоките катови, и мали потреси. Вака беше се’ до пред 22 часот.
Граѓаните на социјалните мрежи споделуваа прашања за тоа што се случува, некои го поврзуваа со минирањето на земјишниот дел кај браната на Отиња, која е во изградба.
Меѓутоа, во случајот, детонациите доаѓаа од Криволак, каде во тек е вежбата ,,Junction City 2025″, во организација на 173-та воздухопловна бригада на Армијата на САД, а со поддршка од АРМ.
„Вежбата ,,Junction City 2025″ придонесува за унапредување на оперативната готовност и заедничката обука на сојузничките сили со цел зголемување на стабилноста, безбедноста и соработката во регионот. 173-та воздухопловна бригада претставува контингентна сила за брз одговор на Армијата на САД во Европа, распоредена во Италија и Германија, подготвена да изврши распоредување и дејствување во краток рок на сојузничките операции. Преку вежбовните активности ќе се зајакне подготвеноста и огнената моќ на падобранските и артилериските единици преку повеќе видови на активности во реални услови и сценарија. Припадниците на 173-та воздухопловна бригада ги усовршуваат тактиките на координиран оган, интеграција на нови беспилотни системи и извршување на командно-контролни процедури во динамична и комплексна средина, соопштија од АРМ.
Вежбата ќе трае уште денеска и утре.
