Денес е Покров на Пресвета Богородица – уште познат и како Покровита Богородица – голем празник кој со особена побожност се чествува во Штип, а најмногу во Ново Село. Празникот го слави чудото од 10-тиот век, кога Пресвета Богородица се јавила во црквата во Влахерна, Цариград, и го раширила својот покров – наметка – над верниот народ, симболично покривајќи ги сите со својата милост, заштита и мајчинска грижа. Од тогаш, Покров се смета за ден на надеж, молитва и небесна закрила.
Во православната традиција, Покров не е само потсетник на чудото, туку и жив израз на верата дека Богородица секогаш се застапува за народот. Во Штип, централно место на одбележувањето е црквата „Св. Богородица Покров“ во Ново Село – духовно светилиште каде што утре од рано утро се очекуваат бројни верници.
Ќе се служи света божествена литургија. Верниците, како и секоја година, ќе дојдат да се помолат, да запалат свеќа и да побараат здравје, заштита и мир во домот.
Покров е и семеен празник – ден кога домот се исполнува со молитва, тивка радост и благодарност. Во Ново Село, каде традицијата се пренесува од колено на колено, денот ќе се одбележи со трпези, гости и благослов.
Во време на предизвици, овој празник потсетува: каде што е Богородица – таму е и утехата, тивката сила и надежта, бидејќи таа е радоста на нажалените, утехата и засолниште на немоќните, прибежиште на вдовците на сиромашните, сенадежна утеха на навредените, силна на беспошните и брзопослушница на сите страдални.
