Финалните подготовки се во тек, Штип и штипјани се подготвени да го прослават јубилејот 100 години фудбалски клуб Брегалница. Утре (петок) од 19:00 часот на градскиот стадион во Штип ќе се одигра ревијалниот меч помеѓу ветераните на штипска Брегалница и Црвена Ѕвезда од Белград.
Како што дознаваме, утре во текот на денот, после пладне ќе пристигне делегацијата од Белград во Штип. После прес-конференцијата која заеднички ќе ја одржат двете екипи, ветераните од двата фудбалски табори ќе положат свежо цвеќе на бистата на Драгослав Шекуларац во центарот на Штип. После завршувањето на фудбалкиот спектакл, актерите од натпреварот ќе имаат заедничка вечера организирана од општина Штип и градоначалникот Иван Јорданов. Инаку, тој, за време на натпреварот ќе додели плакети и благодарници на учесниците на настанот. Делегацијата од Белград и во сабота ќе претстојува во нашиот град. Организирана е заедничка дружба низ центарот на Штип и организирано следење на натпреварот од 4.коло од втората македонска фудбалска лига помеѓу екипите на Брегалница и Новаци.
Напоменуваме дека влезници за натпреварот освен во претпродажба, ќе можат да се купат и на влез, односно на билетарата на градскиот стадион непосредно пред почетокот на натпреварот.
