Огнен Стефановски стана првиот македонски атлетичар кој прескокнал со стап четири метри.
На Европското тимско првенство во Марибор, Стефановски оствари резултат од 4,05 метри и со тоа го собори државниот рекорд кој важеше од 1968 година и беше еден од најстарите во македонската атлетика. Во 1968 рекордот од 3,90 метри го постави Владимир Карер, во Ливорно.
Светскиот рекорд во скок со стап му припаѓа на Швеѓанецот Арманд Дуплантис, кој неодамна во Стокхолм прескокна 6,28 метри.
Дваесетгодишниот Стефановски, кој е член на скопскиот клуб Делта, е универзален атлетичар, па во Марибор настапува и во фрлање копје и на трката на 110 метри со пречки.
На истиот настан, Андреас Трајковски победи во скок во далечина со резултат од 7,83 метри, Дарио Ивановски триумфираше на 5.000 метри со време од 14:04,06 минути, Миљана Ристиќ постави нов национален рекорд на 3.000 метри стиплчејс – 11:49,49 минути, Брајан Авиа освои бронза во скок во височина со личен рекорд од 2,06 метри, штафетата 4х100 метри (Трајковски, Алексовски, Петров, Стојоски) беше втора и постави нов државен рекорд од 40,89 секунди, а Теа Алексовска постави нов младински рекорд во фрлање кладиво со резултат од 38,74 метри.
