Брзата интервенција на лекарскиот тим од Црна Гора го спаси познатиот српски кошаркар Владе Дивац од посериозни повреди. Вграден му е вештачки колк, затоа што најмногу страдал тој дел од телото. Дивац паднал од мотор во близина на Луштица во Црна Гора и не можел да стане поради повредите, пишуваат српските медиуми.
„Според очевидци, Дивац паднал од својот мотор во близина на Луштица и поради повредите што ги здобил при падот, не можел да стане, па набргу потоа бил пренесен во болница. Засега нема официјални информации за степенот на повредата, неговата здравствена состојба или институцијата каде што е сместен на закрепнување“, се наведува во текстот објавен од „Побједа“ кој прв објави за несреќата.
Не е тајна дека кошаркарската легенда често престојува во Црна Гора на брегот. Минатата година, тој беше друштво кога го угости еден од најдобрите кошаркари на сите времиња – Меџик Џонсон, во Бока Которска, пишува Мондо.
Дивац е еден од најдобрите српски кошаркари во историјата, а неговата кариера траеше 22 години, од Слога од Краљево, преку Партизан до НБА лигата, каде што играше за ЛА Лејкерс, Шарлот Хорнетс, а потоа и за Црвена Ѕвезда за време на локаутот, потоа се врати во НБА и ја играше најдобрата кошарка во својата кариера за Сакраменто. Кариерата ја заврши со Лејкерс во 2005 година.
Покрај клупските успеси, Дивац влезе во историјата и како член на југословенската репрезентација.
Освои сребрени медали на Олимписките игри во 1988 година во Сеул и 1996 година во Атланта, два златни медали (1990 и 2002 година) и еден бронзен медал на Светските првенства, три златни медали (1989, 1991 и 1995 година) и два бронзени медали на Европските првенства, како и злато на Универзијадата во Загреб во 1987 година.
