Една од најпознатите брачни двојки во светот на спортот, Бастијан Швајнштајгер и Ана Ивановиќ, повеќе не се заедно. Според пишувањата на германскиот магазин „Бунт“, поранешната српска тенисерка и германскиот фудбалер се разделени веќе два месеца.
Ана, која има 37 години, започнала ново поглавје во својот живот. Таа ги земала трите нивни деца, Лука (7), Леон (4) и Тео (1), и се преселила во Белград, каде што живее во стан од околу 100 квадратни метри, во близина на нејзиниот родителски дом. Соседите ја опишуваат како скромна, приземјена и пријателска, далеку од гламурот со кој порано се поврзуваше.
Во меѓувреме, Бастијан Швајнштајгер продолжува со своите професионални обврски, живее во Минхен и често патува како фудбалски аналитичар. Според блиски извори, токму постојаните патувања, различните живеалишта и недостатокот на семејно време се причините за нивната одлука за разделба.
Иако досега ниту Ана ниту Бастијан не се огласиле јавно за состојбата, сè повеќе детали укажуваат дека нивната врска е пред крај. Тие се венчаа во 2016 година во Венеција и долго време важеле за идеална двојка – хармонични, стилски, секогаш насмеани. Но, како што често се случува, она што го гледа јавноста не секогаш ја одразува реалната состојба во приватноста.
