Ако ви останале варени јајца од Велигден и веќе ви здодеало да ги јадете на ист начин, можете да ги искористите за разни едноставни и вкусни јадења. Овие јадења се подготвуваат брзо, не бараат посебни состојки и повеќето работи веројатно веќе ги имате во вашата кујна.

Француски компири

Состојки:

– 1 кг компири
– 5-6 варени јајца
– 250 г колбаси
– 1 мала павлака
– 2 јајца
– зачини

Подготовка:

Компирите излупете ги и исечете ги на кругови. Во огноотпорен сад или плех наредете еден ред компири, еден ред јајца, потоа еден ред колбаси и продолжете по тој редослед додека не се потроши материјалот.

Секој ред компири и јајца зачинете го по вкус.

Завршете со еден ред компири, а потоа прелијте со смесата од јајца и павлака. Печете на 180 степени 25 минути.

Ќофтиња од јајца

Состојки:

– 300 грама шунка
– 4 варени јајца
– 2 свежи јајца
– 2 лажички презла
– зачини по вкус

Подготовка:

Излупете ги и згмечете ги варените јајца, а потоа исечкајте ја шунката. Во посебен сад изматете ги двете јајца. Измешајте ги изматените јајца со смесата од варените јајца и додајте ја шунката. Додајте зачини по вкус, па добро измешајте.
Кога смесата ќе се соедини, додајте малку презла, онолку колку што е потребно за смесата повеќе да не биде леплива. Формирајте ќофтиња и наредете ги во плех обложен со хартија за печење. Печете 25 минути на 180 степени.