Младата борачка Андреа Нисева обезбеди место во големото финале на Европското првенство до 17 години, кое се одржува во Самоков, Бугарија, откако имаше одличен настап и низа убедливи победи во категоријата до 61 килограм.
Нисева уште од стартот покажа дека е подготвена за висок пласман. На патот до финалето најпрво беше подобра од Теа Донева со убедливи 10-0, а потоа ја совлада и Марија Хрушчова од Белорусија со 4-1. Во четвртфиналето славеше и против Грузијката Ана Церетели со резултат 8-3.
Во полуфиналната борба македонската репрезентативка ја надигра Сурае Мирац Абасој, Азербејџанка која настапува за Финска, победувајќи со 6-4 и така обезбеди место во борбата за европската титула.
Денес, Нисева ќе излезе на душекот во финалето каде ќе се соочи со турската борачка Озденур Озмез во битка за златниот медал.
Благодарение на пласманот на Нисева во финалето, Теа Донева доби можност да настапи во репасажот, каде ќе се бори против Хрушчова од Белорусија, додека Фросина Атанасова го заврши настапот без шанса за репасаж.
