Сјајни вести доаѓаат од Хрватска.
Македонското карате доби нова голема надеж – Љупче Михајлов се искачи на пиедесталот на Младинската светска лига во Пореч, освојувајќи бронзен медал во конкуренција од најдобрите млади каратисти во светот!
Михајлов оствари пет импресивни победи над врвни ривали од:
Холандија, Чешка, Австрија, Полска и Словачка, покажувајќи карактер, подготвеност и исклучителна борбеност.
Во полуфиналната борба, Љупче се соочи со актуелниот светски и европски младински шампион, Питсул од Украина. Во исклучително изедначен и динамичен дуел, Михајлов водеше двапати, но сепак беше поразен со минимални 5:3, што ја потврди високата класа и конкурентност на македонскиот каратист.
„Ова е огромен резултат и уште еден доказ дека сме на вистинскиот пат. Нашата цел останува јасна – медал од Европско и Светско Првенство. Презадоволни сме од настапот на Љупче,“ истакнаа тренерите Жарко и Сашко Арсови, кои стојат зад успехот како водечки имиња на Карате клубот Штип.
Одличен настап имаше и Мила Панчева, која забележа победа над каратистка од Молдавија, а во следната борба беше елиминирана од натпреварувачка од Италија по судиско гласање при резултат 0:0 – уште еден показател за високото ниво на конкуренција.
