Филмскиот и ТВ-монтажер и дизајнер на звук Сашко Мицевски е именуван од Владата за в. д. директор на Агенцијата за филм. Тој доаѓа на местото на Вероника Бучковска, која беше именувана на 17 декември лани.
Мицевски, (чие авторско име е Сашко Потер Мицевски) студирал филмска и ТВ монтажа на Факултетот за драмски уметности (ФДУ) во Скопје, а во 2015, како добитник на стипендија од Министерството за образование и наука (МОН), заминува на постдипломски студии на Националната школа за Филм и телевизија во Англија и работел на филмови прикажани на реномирани меѓународни фестивали.
Неговото професионално искуство опфаќа работа во Англија на проекти за „Би-Би-Си“ и филмови во продукција на „Пајнвуд студиос“ како и авторски ангажмани во постпродукција на македонски аудиовизуелни дела, меѓу кои и ТВ сериите „Преспав“ и „Куќен притвор“. Во 2020 го режираше кусометражниот документарец „Сите ќе умреме“, а во 2013 „(Вон)земјанинот Ли“.
Добитник е на бројни награди, меѓу кои награда од Ројал телевижн сосаети и номинација за Дејтајм Еми.
Во 2020 година, со сопствени средства го возобновува тонското студио на Филмскиот центар „Вардар филм“, а од истата година е и член на Филмскиот совет на Агенцијата за филм.
Лани во ноември беше избран и за член на Советот за култура, стручно и советодавно тело на министерот за култура и туризам Зоран Љутков.
