Претседателот на САД, Доналд Трамп, изјави дека размислува да организира натпревар во мешани боречки вештини (UFC) во дворот на Белата куќа, како дел од националната прослава по повод 250-годишнината од американската независност.
„Дури мислам дека ќе имаме и UFC борба. Замислете такво нешто на терените на Белата куќа. Имаме многу простор таму“, изјави Трамп на отворањето на годишните свечености во Ајова, нагласувајќи дека би сакал борбата да ја следат од 20.000 до 25.000 гледачи. „Тоа би била вистинска борба“, додаде тој.
Претседателот Трамп, кој во изминатиот период присуствуваше на неколку UFC натпревари и одржува блиски односи со претседателот на организацијата, Дана Вајт, најави и голем завршен фестивал во Вашингтон, како и национално спортско натпреварување за средношколци од целата земја.
„Сите наши национални паркови, боишта и историски места ќе имаат посебни настани во чест на 250-годишнината“, додаде Трамп.
Од Белата куќа засега немаат дополнителни детали за оваа најава, но портпаролката Керолајн Ливит изјави дека „претседателот е целосно сериозен“ во врска со идејата.
Минатиот месец, Трамп беше присутен на две UFC борби, седејќи до октагонот заедно со Дана Вајт — што дополнително ги зајакна шпекулациите дека спортскиот елемент ќе биде значаен дел од јубилејната прослава во 2026 година.
