Започна расчистувањето на теренот во центарот на Штип. каде ќе се гради куќата на семејството Зикови и нивните четири близначиња – Михаил, Теодор, Ведран и Леонтина. Плацот од 470 м2 е подарок од општината Штип, а изградбата со одлука на Советот на општината, е ослободена од давачки – комуналии и данок на промет.
Се работи за плац, кој се наоѓа на една од штипските висинки и според компаниите кои доброволно го расчистуваат, е на прилично тежок терен за работа. Организацијата на работите ја презеде хуманитарната организација „Подај рака спаси живот“ на Александар Георгиевски, која досега има бројни вакви хуманитарни проекти.
„Четирите близначиња Михаил Теодор Ведран Леонтина и нивните родители Благица и Александар и те како заслужуваат подршка и помош кампањата за изградба на комплетно нов дом е веќе започната од сите нас зависи дали ова шестчлено семејство ќе живее достоинствено и безгрижно во иднина“, повика Георгиевски на вклучување на хуманите луѓе во изградбата на домот за четворката.
Преку Икрауд платформата за донации, организирана е собирна акција. Планот е да се соберат 2 милиони денари во наредните 65 дена. До сега се собрани 152.700 денари. Во функција е и телефонски број за донации на сите оператори: 143 – 999, а отворена е и сметка за донации.
Во изградбата на куќата за четворката учество најавија и повеќе компании, а таму каде се може помош ќе дава и општината Штип.
-Обезбедивме е и проект за куќата, врз основа на кој е издадена дозвола за граба. Ќе помагаме и при градењето, изјави Вишна Шорова – Ангелова, секретар во Општината Штип.
Михаил, Теодор, Ведран и Леонтина сега имаат една година и девет месеци и веќе се во градинка, која им обезбедена од општината. Брзо помина времето од веста дека во Штип по 26 години повторно се роди четворка.
Родителите Благица и Александар Зикови велат дека куќата на родителите на Александар, каде сега живеат, станува тесно и новиот дом станува вистинска потреба. Предизвик е да се одгледаат четири деца во исто време, особено што во младото семејство работи само Александар.
