Имајќи предвид дека овогодинешниот род на малина во Србија ќе биде многу помал од ланскиот, а понудата е помала и во другите земји кои се главни извозници на ова овошје, одгледувачите на малини организирани во Здружение на производители на малини сметаат дека откупната цена на „црвеното злато“ треба да биде најмалку 450 динари за килограм.
Малините се во фаза на плодоносење, но минатогодишната суша имаше последици за годинашниот род на најсилниот домашен земјоделски извозен производ – ластарите се пократки и има помалку родни гранки.
Родот на „црвеното злато“ оваа сезона дефинитивно ќе биде помал од ланскиот, а агроаналитичарите проценуваат дека откупната цена на килограм малини би можела да се движи од 350 до 400 динари.
„Овогодинешната реколта тежи над 25.000 тони“
Но, со нив не се согласува претседателот на Здружението на производители на малини на Србија, Добривоје Радовиќ кој вели дека „аналитичарите седат во Белград“ и не ја следат секојдневната ситуација со малините.
– Едноставно ги нема тие количини за ваква цена, а тоа е најкраткиот извештај од малинарниците. Ако лани имавме 40.000 тони малини произведени во Србија, годинава производството тешко дека ќе надмине 25.000. Во моментов, се случува да биде релативно топло во текот на денот, но ноќите и утрата се екстремно студени. Ваквите удари заедно со претходниот априлски мраз веќе уништија добар дел од родот. Малините никаде ги нема во полн цут, објаснува Радовиќ.
Затоа, како што вели, откупната цена на малините треба да биде најмалку 450 динари за килограм со тенденција на растење, и тоа не само поради значително помалиот очекуван род.
– Ладилниците секогаш велеа дека цената на малините зависи од понудата и побарувачката. Сега имаме ситуација во која понудата во светот, во Европа и кај нас е помала од лани. Истовремено, малопродажната цена се движи од 460 до 520 динари со вклучен ДДВ. Конечно, кога ќе ја споредиме нашата ситуација со земјите кои се лидери во производството на малини, сосема е реално дека годинашната цена ќе биде 450 динари за килограм локални малини во гајба – смета Радовиќ.
Тој напоменува и дека цената на чинење на малините во моментов се движи меѓу 350 и 380 динари за килограм.
Површините под малина постојано се намалуваат
Според него, моментално има помали количини во магацините на домашните ладилници, но во исто време, особено на подрачјето на Западна Србија, „се уште има производители на кои предадените малини не им се исплатени заклучно со 2022 година“.
– Моментално малините се произведуваат на само 8.000 хектари, што е многу помалку од некогашната рекордна површина од 24.000 хектари. Дека до пред година-две имавме насади на 11.000 хектари, говори тенденцијата на намалување на површините под малина. А токму ниската цена со години влијаеше кај одгледувачите на малини да не се гледа интересот или економската пресметка во ова производство, поради што не инвестираа во насади, ниту применуваа агротехнички мерки, туку ги намалија насадите – објаснува претседателот на Здружението на производители на малини.
Според Радовиќ, квалитетот на српските малини е сè уште меѓу најдобрите во светот, но за да бидат конкурентни, изостануваат количините.
– Бидејќи од 80.000 па и повеќе од 100.000 тони во рекордни години отидовме на ланското производство од околу 40.000 тони малини. Затоа не сме во неволја само ние производителите, туку и ладилниците и извозниците. Што им вредат нивните капацитети ако ја немаат робата – заклучува Радовиќ, пишува српски Блиц.
