Во Софија и други населби низ Бугарија, се одржаа демонстрации во знак на одбрана на бугарскиот лев. Учесниците на протестите бараат опстојување на државната парична единица – левот, плебисцит за еврото и абдикација на актуелната Влада.
Протести беа организирани и во Варна, Велико Трново, Плевен, Русе, Хасково и Јамбол. Протестот беше организиран од граѓанската иницијатива „Разбудени“. Граѓаните стравуваат од покачување на цените, но како што велат се плашат од тоа дали институциите ќе спроведат замена на валутата без било какви злоупотреби.
- Се ќе поскапи, цените ќе се кренат, ситуацијата ќе стане многу лоша. Сега мафијашите само ги лажат луѓето.
- Одете веднаш и видете ги цените во моментот како се еднакви на еврото. Цент по цент тоа се многу пари. Сакаме да си го зачуваме нашиот суверенитет. Тоа е пред се, сакаме да бидеме независни. Сакаме ние да работиме со нашата валута, а не таа да работи со нас.
Иницијаторите на протестот ги повикаа граѓаните да се соберат уште еднаш на 8 јули, кога се очекува конечната одлука за приклучување на Бугарија во еврозоната од јануари 2026 година. Дел од бугарските економисти, пак, сметаат дека влезот во еврозоната ќе донесе финансиски придобивки за домаќинствата и бизнисот.
