Кина претстави нова генерација на минијатурни беспилотни летала, дизајнирани за тајни воени и шпионски мисии, објави германскиот „DW“, повикувајќи се на репортажа емитувана на воениот канал CCTV7 на кинеската државна телевизија.
Мини-дронот, кој изгледа како комарец со две крилца налик на пердуви, тенко тело и три ногарки, е дело на Националниот универзитет за одбранбени технологии (NUDT) во Кина. Ова летало е наменето за разузнавачки операции, а според истражувачот Лијанг Хејсианг, кој работи и на развој на хуманоидни роботи, „минијатурните бионички роботи како овој се особено соодветни за шпионски мисии и специјални операции на военото поле“.
Покрај дронот-комарец, во прилогот беше прикажан и прототип на уште еден мини-дрон со четири крилца, кој може да се управува преку мобилен телефон.
Изненадување претставува не само технолошкиот напредок што го демонстрира Кина, туку и фактот дека ваков тип на шпионска технологија се прикажува јавно. Производството на вакви микродронови е мошне комплексно: потребно е прецизно вградување на микрофони, камери, управувачки системи и напојување во исклучително ограничен простор. Леталото притоа мора да биде тивко, робусно, со долг домет и висока отпорност на надворешни услови.
Ваквиот развој бара мултидисциплинарна експертиза од области како што се роботика, материјали и сензорска технологија – знаења што главно се достапни во воени истражувачки институции.
Потрагата по мали, но издржливи дронови е глобален тренд. Нивните имиња често се инспирирани од инсекти – пчели, стршлени, комарци – поради бионичкиот дизајн што го следат. Кинескиот дрон има голема сличност со американскиот „RoboBee“, кој Харвард првпат го претстави во 2013 година за еколошки мониторинг и земјоделски цели, но кинеската верзија е уште помала и веројатно повеќе милитаризирана.
Иако мини-дроновите како „RoboBee“ можат да слетуваат на површини користејќи статички електрицитет или дури и да летаат од вода, тие сѐ уште не се доволно робусни за реални борбени услови. За такви мисии, воените сили се потпираат на пософистицирани модели.
Еден од најпознатите е „Црниот стршлен“ (Black Hornet) – дрон со големина на дланка, развиен во Норвешка, кој веќе неколку години се користи за тактичко извидување. Германската војска исто така го набави овој модел за дискретно оптичко извидување на блиско поле. Дронот има инфрацрвена камера, тивок погон и може да лета до 25 минути, испорачувајќи снимки со висока резолуција и откривајќи можни експлозивни направи.
Американските воздухопловни сили, пак, уште во 2021 година потврдија дека работат на свои мини-дронови, но нема официјални информации за степенот на развој или нивна можна оперативна употреба.
Сѐ на сѐ, трката за супериорност во микро-дрон технологијата станува сѐ поинтензивна – со Кина како сѐ поагресивен играч во оваа сфера.
