Српскиот кошаркарски стручњак Жељко Обрадовиќ е повторно во центарот на вниманието во европската кошаркарска јавност, а според каталонските медиуми, токму легендарниот стратег е првата желба на Барселона за следната сезона. Веста одекна како вистинска „детонација“ во Евролигата, особено по шпекулациите дека Обрадовиќ би можел да седне на клупата на Панатинаикос, клуб со кој бележеше големи успеси во минатото.
Според „Л’Еспортиу“, најтрофејниот тренер во европската кошарка веќе почнал сериозно да ги разгледува опциите за иднината и сака одлуката да ја донесе веднаш по фајналфор турнирот, кој заврши изминатиот викенд. Во Барселона сметаат дека токму неговото име е идеално решение во момент кога клубот сака повторно да се врати на самиот европски врв.
Дополнителен притисок за Каталонците создава и најавеното заминување на Чави Пасквал во тимот на Дубаи, па челниците сакаат брзо да реагираат и со големо име да ги смират навивачите. Обрадовиќ, со своето богато искуство и девет титули во Евролигата, е профил што совршено се вклопува во амбициите на Барса. Инаку, Обрадовиќ на почетокот од минатата сезона го предводеше тимот на Партизан, но поради серијата лоши резултати во Евролигата, реши да си поднесе оставка, а на негово место во клубот дојде Шпанецот Жоан Пењароа.
Во меѓувреме, конкуренцијата во Евролигата станува сè посилна. Новиот шампион Олимпијакос веќе работи на засилувања, што дополнително ја зголемува тензијата пред новата сезона.
Доколку овој трансфер навистина се реализира, тоа би бил еден од најголемите потези во европската кошарка во последните години и јасен сигнал дека Барселона тргнува по европската круна со најсилното можно оружје – Жељко Обрадовиќ.
