Пожарот во дискотека во Букурешт од 2015 година разоткри корупција во романското здравство и резултираше со оставка на премиерот. Покрај 24-те загинати во пожарот, починале уште над 30 повредени поради несоодветна медицинска нега.
По трагедијата во дискотеката во Кочани, деновиве честопати се спомнува сличен инцидент од Романија – пожарот во дискотека во Букурешт поради кој загинаа 64 лица.
Покрај безбедносните пропусти во дискотеката, трагедијата разоткри и многу поголема корупција во здравството на Романија, што резултираше со оставка на тогашниот романски премиер.
Како настанал најсмртоносниот пожар во историјата на Романија?
Клубот „Колектив“ (Colectiv) бил отворен во 2013 година, во поранешна фабрика за чевли.
На 30-ти октомври 2015 година, романскиот метал бенд Goodbye to Gravity имал концерт во дискотеката, по повод издавањето на нивниот нов албум.
Влезот бил бесплатен, а бендот најавил и шоу со пиротехника.
Концертот почнал во 21 часот, а околу 22:30 почнало шоуто со пиротехника.
Речиси веднаш, искра од огнометите ја запалила пената за звучна изолација на таванот која била направена од лесно запалив материјал.
Пожарот се проширил во секунда, по што се срушил таванот.
Само две минути подоцна била повикана противпожарна служба, а во дискотеката веќе владеел хаос.
Исто како во дискотеката во Кочани, од локалот имало само еден излез, па кога сите гости тргнале кон него, се создало стампедо.
Вратата не била целосно отворена, па луѓето буквално се качувале едни врз други со надеж дека ќе се спасат.
Голем дел од загинатите биле повредени во стампедото, дел вдишале токсични гасови кои се ослободиле од пожарот, а многумина се здобиле и со тешки изгореници.
Први на местото пристигнале неколку лекари и медицински сестри од болница во непосредна близина, а неколку минути подоцна пристигнала и противпожарната служба.
На преживеаните им била укажана прва помош, а потоа биле пренесени во болници низ Букурешт со брза помош и такси возила.
Многу од луѓето кои живееле во околината и имале автомобили исто така превезувале пациенти.
Во дискотеката загинале 27 лица, а околу 180 биле повредени.
Во наредните неколку недели, дури 37 од хоспитализираните им подлегнале на повредите.
И, тогаш се открил можеби најголемиот скандал во здравствениот систем на Романија – голем дел од хоспитализираните починале поради несоодветна медицинска нега.
Непосредно по пожарот, многу од повредните биле испратени во други држави бидејќи Романија немала средства и услови да им помогне на сите.
Но, пред да бидат испратени во странство, дел од повредените поминале неколку денови во романски болници каде што се заразиле со бактериски инфекции.
Лекарите од другите земји ги забележале заразите и целата ситуација им делувала чудно бидејќи такви бактерии можело да се најдат само во воени зони, како во Авганистан, а најмалку во болница со стерилна околина.
Во 2016 година, по независна истрага од страна на некои лаборатории, се открило дека средствата за дезинфекција во романските болници се всушност разредени до тој степен, што не биле ни ефикасни.
Фармацевтската фирма одговорна за снабдување на болниците – Hexi Pharmа – била одредена од страна на тогашниот премиер.
Фирмата снабдувала околу 340 болници со средства за дезинфекција.
Иако со години имало индикации дека средствата за дезинфекција во романските болници не ги исполнуваат стандардите, дури трагедијата во дискотеката и необјаснивата смрт на оние со полесни повреди поттикнала истрага.
На 6-ти мај 2016 година, над 500 луѓе излегоа на протест во Букурешт, а два дена подоцна, министерот за здравство си поднесе оставка.
Премиерот, пак, ја напушти функцијата пред крајот на мај истата година.
Сопственикот на фармацевтстката компанија загинал во сообраќајка пред да се разоткрие аферата, додека во мај 2016-та беше уапсен генералниот менаџер.
За пожарот, пак, беа уапсени осум лица, вклучувајќи ги и сопствениците на дискотеката.
Сите осум беа прогласени за виновни и добија по неколку години во затвор – вкупно 61.
Најдолга казна доби едниот од сопствениците – 11 години и 8 месеци.
За пожарот и настаните кои водат до разоткривање на корупцијата е снимен и документарец – Collective – кој доби две номинации за Оскар во 2021 година.
