Тројца млади штипјани, ученици од СОУ „Славчо Стојменски“ – Марио Ванчоски, Иван Костевски и Даниел Христов, блеснаа на светската Менделеевa олимпијада по хемија, која годинава се одржа во Бразил. Во конкуренција од 192 учесници од 39 земји, тие постигнаа извонреден успех, освојувајќи два бронзени медали и на најубав можен начин ја претставија Македонија.
Посебно се истакна Марио Ванчоски, кој освои еден од бронзените медали и уште еднаш го потврди Штип како центар на знаење и младински талент. Овие ученици се дел од македонскиот тим и стипендисти на Општина Штип, што дополнително сведочи за значењето на локалната поддршка за млади талентирани ученици.
„Им честитав лично на овие млади гении за нивниот успех. Тие се доказ дека трудот, знаењето и посветеноста се исплатат. Ваквите успеси се инспирација за сите млади во нашата држава“, истакна градоначалникот на Штип.
Општина Штип најави дека ќе продолжи со стипендирање и поддршка на ученици кои со својот труд и знаење го претставуваат градот и државата на највисоко ниво.
Со овој подвиг, Штип уште еднаш се запиша на светската научна мапа – како град каде растат идни научници со светла иднина.
