Шведскиот фудбалер Златан Ибрахимовиќ зборуваше на својот мајчин јазик за емисијата „(Не)успех на шампионите – Златан Ибрахимовиќ“, емитувана на Арена Спорт, и притоа откри детали од својот живот и кариера за кои малкумина знаеле.
„Ако сум поинаков од другите – така ми е најдобро“, се опиша на почетокот на разговорот со една реченица популарниот Ибра, а потоа откри дека никогаш не би бил тренер.
„Ако некој бил голем играч, автоматски мисли дека може да биде и голем тренер. Тие две работи треба да се раздвојат. Кога сме на терен, јас имам победнички менталитет и кога не победуваме, како да не сум жив. Ова што го работам денес е поинаква ситуација. Тука сум, растам… Кога играч сака да стане тренер, треба да почне од нула. Но егото тоа не го дозволува“, изјави Ибрахимовиќ.
Гето во Шведска
Со доза гордост, Ибрахимовиќ зборуваше за своите почетоци.
„Роден сум во Малме. Го нарекуваат ‘гето’, но за мене тоа не беше така. Тоа беше мултикултурна средина. Татко ми е муслиман, а мајка ми католикинка“, започна Златан.
„На тренинг не одев со автобус. Првпат во животот се возев со зелениот автобус кога ме повика еден другар. Играв за помалиот клуб ‘Балкан’, а потоа отидов на проба во Малме. Од тогаш редовно се возев со автобус. Бидејќи немав пари за билет, понекогаш морав да користам велосипед.
„Имав што да јадам – тестенини, леб и млеко. За мене тоа беше ‘вау’. За други работи дури и не знаев. Мајка ми работеше како чистачка, а татко ми беше мајстор. Работеа по цел ден, а јас останував сам дома.“
