Трета година по ред Сингапур е прогласен за најскап град во светот за живот на богатите лица (High-Net-Worth Individuals – HNWI), и повторно ги надмина Лондон и Хонгконг.
Овој град-држава го зазеде првото место по цените на автомобилите и женските чанти, второто место по цените на женските чевли, како и трето место по цените на недвижностите и здравствената заштита, покажува извештајот за глобално богатство и животен стил 2025 што минатиот четврток го објави швајцарската банка „Јулиус Баер“.
Во споредба со претходната година, Сингапур забележа најголем раст на цените на авионските билети во бизнис-класа, кои пораснаа за 17 отсто. Цените на велосипеди и школарини во приватни училишта следуваа со зголемувања од 15,6, односно 12,1 отсто.
Сепак, Сингапур и понатаму останува многу пријатен град за живеење, кој привлекува глобални компании и богати лица, луѓе со имот вреден милион или повеќе американски долари.
– Со оглед на денешната непредвидлива ситуација во светот, Сингапур е ценет поради стабилноста, безбедноста и поврзаноста со Азија и пошироко – се наведува во извештајот.
Лондон се најде на 2. место, додека Хонгконг беше трет
За да ја создаде оваа листа, банката „Јулиус Баер“ анализира 20 производи и услуги во 25 глобални градови. Овие ставки претставуваат производи и услуги што богатите лица најчесто ги избираат, вклучувајќи автомобили, часовници, чанти, како и услуги како здравствена заштита и приватно образование.
Исто така, банката спроведе анкета меѓу богатите лица во периодот од февруари до март 2025 година за подобро да ги разбере нивните потрошувачки навики, стил на живот и финансиска ситуација.
Лондон се најде на 2. место, додека Хонгконг беше трет, што претставува промена во однос на извештајот од минатата година. Глобално гледано, трошоците за луксузен живот, претставени преку кошница од производи и услуги, паднаа за 2 отсто во последната година измерено во американски долари, што е обратен тренд во споредба со растот од 4 отсто во 2024 и скокот од 6 отсто во 2023 година.
– Значајниот вкупен пад ја одразува слабата побарувачка за луксузна стока бидејќи потрошувачите ги менуваат своите приоритети од материјални добра кон искуства – се наведува во извештајот.
Во регионот Азија-Пацифик богатите лица забележаа поизразен раст на трошоците поврзани со животниот стил во споредба со другите делови на светот. Овој регион беше лидер во глобалниот раст на цените во сегментите на женска луксузна облека, луксузни хотели и врвна гастрономија. Најголем раст на цените во овој регион беше забележан кај авионските билети во бизнис-класа и луксузните часовници, кои пораснаа за 12,6, односно 9 отсто.
