Македонскиот документарен филм „Приказната за Силјан“ на режисерката Тамара Котевска продолжува да бележи голем меѓународен успех.
Филмот триумфираше на престижните IDA Documentary Awards во Лос Анџелес, освојувајќи ја наградата за најдобар документарен филм и наградата за најдобра камера, споделија од Министерството за култура и туризам.
Ова филмско остварување веќе имаше успешни премиери во Венеција, Торонто и САД, а наскоро и во Британија. Филмот е откупен од National Geographic Documentary Films, што му обезбедува глобална дистрибуција и силна поддршка во претстојната оскаровска трка.
Котевска победата ја посвети на независните автори и истакна дека овој успех претставува важен чекор кон потенцијална номинација за Оскар.
Филмот ја пренесува топлата приказна за земјоделецот Никола и повредениот бел штрк и го позиционира македонското документарно творештво како значаен дел од современата светска кинематографија.
