Британката Елби Хеншо од Барнет, северен Лондон, откри дека животот во „гламурозниот“ Дубаи не е толку лесен како што изгледа на социјалните мрежи.
Од сон за луксуз – до шест дена работа неделно
Хеншо, 23-годишна персонална тренерка, се преселила во Дубаи во јануари, откако за време на одмор се вљубила во Арапскиот Полуостров. Со финансиска помош од родителите го започнала новиот живот и брзо нашла работа во теретана со „клиенти од високото општество“.
Но, трошоците ја дочекале со вистински шок. Вели дека и обичен јогурт чини 12 фунти, а животот бара најмалку 5.000 фунти месечно за комотен стандард. За да може да си дозволи живот во градот, таа денес работи шест дена неделно, а често и дополнителни смени.
– Во Британија бев депресивна и безволна. Овде сите се посреќни, поактивни и постојано сакаат да бидат подобра верзија од себе – објаснува Елби.
Трошоци и реалност
Хеншо во Дубаи дели стан со уште две девојки. Освен високите кирии и депозитите за станови и автомобили, вели дека и секојдневните трошоци се многу скапи:
- капучино – 34 дирхами (7,9 евра)
- мелено месо – 25 дирхами (5,7 евра)
- јагоди – 30 – 40 дирхами (6,9 – 9,2 евра)
- јогурт Fage, 1 литар – 60 дирхами (13,8 евра)
- најевтино парче облека во Zara – 130 – 150 дирхами (30 – 35 евра)
- чаша вино во клуб – најмалку 99 дирхами (23 евра).
– Работам постојано за да можам да уживам во градот. Има многу групи и апликации за викенд-работи, па секогаш може да се најде дополнителен извор на приход – додава таа.
Живот помеѓу луксуз и осаменост
Преселувањето не било лесно – првите месеци ги минала во средување на документи, отворање сметки и прилагодување на новиот ритам. Вели дека во Дубаи недостига „чувство на заедница“ и дека запознавањето партнери е многу потешко без апликации.
– Тешко е да запознаеш некого спонтано, сите се презафатени 24/7. Луѓето обично доаѓаат со семејства или партнери, а оние што се слободни ретко бараат нешто сериозно – истакнува таа.
Иако и недостигаат пабовите и заедничкиот дух од Британија, Елби признава дека се заљубила во градот и не планира наскоро да се врати.
– Сакам животот овде, но ако на 27 години сè уште не сум во сериозна врска, ќе се вратам во Британија – вели таа.
