Најмалку десет луѓе загинаа, а 20 се повредени во пожар во дом за стари лица во Тузла. Пожарот избувнал на седмиот кат од зградата синоќа околу 20:45 часот и причината засега не е позната.
Околу 20 луѓе се примени во болница и меѓу нив се штитеници на домот и припадници на спасувачките екипи, објави полицијата.
„Според првичните информации, во пожарот настрадаа десетмина штитеници на домот. Целосна истрага ќе биде спроведена откако условите ќе бидат безбедни“, соопшти министерството за внатрешни работи на Тузланскиот кантон.
Босанскиот премиер Нермин Никшиќ го опиша пожарот како „инцидент од огромни размери“.
Штитеничката на домот Ружа Кајиќ, која живее на третиот кат, изјави дека се разбудила откако слушнала звук на пукање.
„Погледнав низ прозорецот и видов како запалени остатоци паѓаат од горе. На горните катови лежат неподвижни луѓе“, рече таа.
Според портпаролот на Универзитетскиот клинички центар во Тузла, тројца пациенти се на интензивна нега.
