Модуларната болница во Штип, која по завршувањето на пандемијата остана нефункционална и беше честа мета на вандализам и кражби, наскоро ќе добие нова намена – ќе се трансформира во современа специјалистичка амбуланта.
Наместо во старата зграда на болницата, закажаните прегледи преку системот „Мој Термин“ ќе се реализираат во адаптираниот модуларен објект. Според директорот на Клиничката болница Штип, Владко Захариев, 90 проценти од постапката за преадаптација веќе е завршена.
„Нашата цел е да овозможиме целосна реконструкција и преадаптација на модуларната болница за извршување специјалистички прегледи преку системот ‘Мој Термин’. Речиси 90% од целата процедура е спроведена. Веќе е поднесено барање до Управниот одбор на Фондот за здравствено осигурување, и во очекување сме на одобрување на потребните финансиски средства. Наш план е да започнеме и завршиме со постапката што е можно поскоро,“ изјави Захариев.
Во координација со Општина Штип, ќе се уреди и околниот простор, со изградба на паркинг и пристапна инфраструктура до самиот објект.
Според податоците на Клиничката болница, во текот на изминатата година преку амбулантите биле прегледани над 150.000 пациенти, при што најголем обем на работа е регистриран во одделите за ортопедија и хирургија. Со дислокацијата на дел од амбулантите во модуларната болница, ќе се создадат услови и за конечно отворање на Ургентниот центар во рамки на штипската Клиничка болница.
