Не би навлегувал подетално во анализа, но кај него го забележувам предавничкиот, поданички и кодошки однос – одговори Мицкоски на прашањето за критиките дека Филипче ги поткопува државните интереси.
Премиерот Христијан Мицкоски денеска го критикуваше опозицискиот СДСМ, обвинувајќи го за неконструктивност во процесот на евроинтеграциите и за политичка стратегија која, според него, води кон самоуништување.
Тој изјави дека поради едноцифрениот рејтинг, постои реална опасност СДСМ да не опстои по следните локални избори.
– Градиме, се бориме низ целиот свет, а тој (Венко Филипче) со една изјава вели – “јас прифаќам сѐ што ќе ми ставите на маса, само вратете ме на власт“. Тоа не е конструктивност, тоа е рушење. Затоа имаат едноцифрен рејтинг и мислам дека постои сериозна опасност дали таа политичка партија ќе продолжи да постои по локалните избори – изјави Мицкоски на новинарско прашање по отворањето на реновираниот туристички комплекс „Македонско село“.
– Не би навлегувал подетално во анализа, но кај него го забележувам предавничкиот, поданички и кодошки однос – одговори Мицкоски на прашањето за критиките дека Филипче ги поткопува државните интереси.
На прашањето дали изјавите на Филипче за наводна автократија во политиката се точни, Мицкоски одговори:
– Мислам дека јавноста тоа го гледа јасно. Тоа е позната стратегија на СДСМ. Тие мислат дека на таков начин ќе добијат нова шанса да ја водат владата, но тоа е стратешки погрешна комуникација. Ако испраќате порака што мнозинството граѓани не ја чувствува, таа порака е за џабе – вели премиерот.
Мицкоски додаде дека политиката треба да биде во склад со чувствата и потребите на граѓаните, а не со „политички ќорци“.
Во врска со обвинувањата од СДСМ за селективна истрага за пожарот во Кочани и за фирмата „Салтировски консалтинг“, Мицкоски ја отфрли можноста за политичко влијание, посочувајќи дека истрагата ја води јавното обвинителство, избрано токму со поддршка на СДСМ и ДУИ.
– Тоа е стратегијата на СДСМ – преку некрофилија да добијат политички поени. Владата не е дел од истрагата. Јавниот обвинител Љупчо Коцевски беше избран со огромно мнозинство од СДСМ и од ДУИ, а и други обвинители во тимот имаат нивна поддршка – рече премиерот.
